118 árum eftir að skipbrotsmennirnir komust í skjól var farið í leiðangur á strandstaðinn.

„Þetta er í fyrsta skipti sem maður fær séð og snert eitthvað sem fór um hendur þessa fólks og þetta veitir manni enn sterkari tilfinningu fyrir sögunni og raunveruleika hennar,“ sagði Einar Magnús þegar hann fékk litið augum næluna og orðuna sem keisari Þýskalands veitti íslensku björgunarfólki.

Skömmu síðar var Einar Magnús kominn upp í flugvél á leið til Þýskalands til að fá barið augum áður óþekktar og ómetanlegar heimildir, ritaðar af skipstjóranum Georg Büschen, um hrakningar mannanna á Íslandi.

Það hefur kviknað mikill áhugi á þessu verkefni í Þýskalandi og hafa fjölmiðlar þar fjallað um Að baki mánans og þær rannsóknir sem liggja að baki handritaskrifunum.